துல்லியமாக மதிப்பீடிட்டு
உன் மதிப்பு இவ்வளவுதான்
என்றுரைக்கும் தராசெனத்
தம்மை நினைக்கும் உறவுகள்
நட்புகள் உண்டு நம்மிடையே....
உறவதனைப் பெரிதென நினைத்து
உண்மையை விளக்கினாலும்
தான் பிடித்த முயலுக்குக்
கால்கள் மூன்றெனவே சாதித்து
வாதிட்டு ஆக்குவார் பித்தென்று.....
வார்த்தைக்கும் சொல்லுக்கும்
அர்த்தங்களோ ஆயிரம்
அனர்த்தங்களோ பல கோடி
வரிகளை வலிகளாக்கும்
வல்லமை பெரிதும் பெற்றோர் ....
பிறர் வலி உணர்ந்தோர் என்றும்
புறம் பேசித் திரிவதுமில்லை
உறவுகள் பேண நினைப்போர்
குறை கூறி வருத்துவதில்லை
தன் நிலை உணர்ந்தவர் பிறரை
சந்தேகங் கொண்டு பார்ப்பதுமில்லை....
பச்சாதாபம் தன் மேல் கொண்டு
பழியதனைப் பிறர் மேல் சுமத்திப்
பாரினில் தனைப்போல் யாரும்
பாரங்கள் சுமந்ததில்லை என்று
பந்தயம் கட்டி வாழ்ந்து
பரிவதனைத் தேடி நிற்போர்
போகட்டும் ....மன்னிப்போம்
பாவப்பட்ட மனிதர்களை....
கவியாக்கம் - ரத்னா வெங்கட்.
No comments:
Post a Comment