#இருட்டில் ஒளிந்திருக்கும் விடியல்.
#மீ மொழி செய்யுட்கலை சூடிகை.
22.01.17
***********
நமக்குள்ளே மறைந்திருக்கும் ஆற்றலை
இறைத்தன்மையை உணரும் சாத்தியம்
ஐம்புலனைக் கட்டுப்பாட்டில் வைத்து
நமக்குள்ளே தேடும் கணத்தில்
புலப்படும் ஒளியில் புரியும்
பிரச்சினைகளின் தீர்வு சிக்கலின்
ஒரு முனையைக் கண்டுபிடிப்பதிலென்று!
நுனி கிடைக்காத பட்சத்தில்
அமைதியாய் அங்கீகரிப்பதிலென்று!
வாழ்க்கை நமக்கென மறைத்து வைத்திருக்கும் ரகசியங்கள்
முன்னமே தெரிந்துவிட்டால்
சுவாரசியம் என்பது ஏது?
***********
திரிந்த பாலெனத்
தன்னுள்ளே
சுவாரசியமான இனிப்பை
அடக்கிய காலத்தின்
ஒரு பாதியாய் நீண்ட இரவு
தொலைத்த ஒன்றை
தொலைத்த இடத்தில்
திரும்பத் திரும்ப
தேடி அலுத்துப் போனதன்
துடிப்பு
நட்சத்திரம் உறங்கிய
பொழுதொன்றில்
துயரின் நிழல் நீண்டு
ஆட்சி செலுத்தத்
தலையணை வைத்து
அமுக்கப் பார்த்தும்
புரண்டு திமிறி
இமைகளைக்
கல்லாய் அமிழ்த்திடும்
கனவொன்றை
நிறுத்தி வைத்து
அனிச்சையாய்த் தொடர்ந்த
தேடும் படலமொன்றைத்
தன்னிச்சையாய்
உள் நோக்கித் திருப்பிட
உபரியாய்க் கைகள் கொண்டு
ஆழ்ந்து அகழ்ந்து
அமிழ்ந்திட விடாது
கலைக்கும் பிசாசுகள்
உதறிச் செல்லும்
ஒரு முகப்படுத்தி கவனம் குவித்திட!
நீர்த்துப்போன நிராசைகளை
வடிகட்டி உருவற்ற வெண்மையொன்றை
உணர்ந்து உள்வாங்கி
உருவேற்றப் பிறந்திடுமோர்
ஒளியின் துளி
உள்ளிருந்த இருளினின்று
வெளிப்படுமோர் உண்மையான
இனிப்பன்றோ?
#ரத்னாவெங்கட்.
No comments:
Post a Comment