#தூண்டுகோல்
27.09.16
உள்வாங்கும் திரியதனைத் தூண்டிவிட
முத்துப்போல் சுடரதுவும் நிலைத்து எரியும்
குடத்தினிலே விளக்கெனவே இருப்பவரைக்
குன்றிலிட்ட சோதியாக்கல் தூண்டுதலே
விழுந்தெழுந்து நடை பழகும் குழவியதும்
விழாமலே ஓடப்பழகுவதும் -மழலைப்
பேச்சை மகிழ்ந்து போற்ற எதிர்காலப்
பேச்சாளர் உருவாவதுவும் தூண்டுதலால்
சின்னஞ்சிறு அச்சாணி தேர் அதனின்
பெரு உருவம் தாங்கி நிற்கும் பலமதுவே
பெருஞ் செயல்கள் செய்தோரின் செயல்களதின்
சின்னஞ்சிறு பின்புலமும் தூண்டுதலே
திறமை கண்டால் மகிழ்ச்சி கொண்டு
தட்டிக் கொடுத்து உயர்த்திவிடும்
நற்பண்பு சான்றோர் தகைமையென உணர்ந்தே
நாம் அதன்வழி காண்பதுவும் தூண்டுதலே
உடைந்திட்ட உள்ளமது கண்டால்
உறவென்றே கையதனை நீட்டிக்
கண்ணீரதனைத் துடைத்துக்
கலங்காதிருக்கும் வழியதனைக் காட்டும்
வழுவா ஊக்கமது பெற்றிட்டோர்
பெற்றதைப் பகிர்ந்திடக் கற்றிட்டோர்
கற்றதைச் செயலாக்கம் செய்திட்டார்
அனைவரும் தூண்டுகோலே....
கவியாக்கம் - ரத்னா வெங்கட்
No comments:
Post a Comment