#நெடுந்தூரப் பயணம்
06.10.16
தாய்மடி சேர ஓட்டமெடுத்துத்
தனியொரு ஆளாய் இடமும் பிடிக்கத்
தொடங்கிடும் நம் கருவறைப் பயணம்
விழியது திறந்து வீழ்ந்திட்ட நேரம்
புவியது தாங்கிட உயிர்த்திட்ட கணத்தில்
தொடங்கிடும் நமது வாழ்க்கைப் பயணம்
நெல்லில் எழுதிய அகரம் தொடங்கி
மேற் படிப்புகள் பட்டங்களென்றே
வேலையில் முடிவது கல்விப் பயணம்.
இருமனம் இணைந்த காதலுமிங்கே
திருமணம் கண்டு இறுதி வரையில்
இயைந்து வாழ்தல் இல்லறப் பயணம்.
மக்களைப் பெற்று மனிதராய் வளர்த்து
நற்பண்பு புகட்டும் நட்பாயிருக்க
மலரும் நல்லறப் பயணம்
சுயநலமில்லா மனிதம் படைத்து
பிறர்நலம் காக்கச் சிறிதளவேனும்
நன்மை பயத்தல் மனிதப் பயணம்
தேடுதல் இல்லா மனிதருக்கிங்கே
நின்றிட இயலா ஓட்டம் இதுவே
தேடித் திரிபவர் மகிழ்ந்து உணர்ந்து
பகிர்ந்தே ரசிக்கும் நெடுந்தூரப் பயணம்
கவியாக்கம் - ரத்னா வெங்கட்.
No comments:
Post a Comment